ភ្នំពេញ៖ សាលាវិទ្យាល័យអប់រំពិសេសក្រុងតាខ្មៅមានគម្រោងអភិវឌ្ឍន៍ហេដ្ឋារចនាសម្ព័ន្ធបន្ថែមនៅឆ្នាំ ២០២៣ខាងមុខ ដើម្បីឱ្យកុមារដែលខ្សោយសតិបញ្ញានិងអូទីស្សឹមទាំងអស់ទទួលបាននូវការបណ្តុះ បណ្តាលអប់រំ វិជ្ជាជីវៈបានគ្រប់ៗគ្នាដូចកុមារដទៃ។

លោក ចាន់ សារិន នាយកសាលាវិទ្យាល័យអប់រំពិសេសក្រុងតាខ្មៅបានប្រាប់វិទ្យុជាតិកម្ពុជាថា បច្ចុប្បន្ននេះវិទ្យាល័យអប់រំពិសេសក្រុងតាខ្មៅមានលទ្ធភាពទទួលកុមារបាត់បង់សតិបញ្ញានឹងអូទីស្សឹមប្រមាណជាង២០០នាក់ ឱ្យទទួលបានការបង្ហាត់បង្រៀនពីរបៀបទំនាក់ទំនងមនុស្សជុំវិញខ្លួន របៀបសរសេរ ការអប់រំផ្លូវចិត្តផ្សេងៗពីលោកគ្រូអ្នកគ្រូ ហើយក៏មានអាណាព្យាបាលកុមារអូទីស្សឹមជាង៦០០នាក់បន្ថែមទៀតផងដែរ ដែលកំពុងស្នើសុំយកកូនមកទទួល ការបណ្តុះបណ្តាល។

លោកបន្តថា ដោយមានការគាំទ្រពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌ មាន និងលោកជំទាវ រួមជាមួយសប្បុរសជន វិទ្យាល័យអប់រំពិសេសក្រុងតាខ្មៅ នឹងរៀបចំ ផែនការមេសម្រាប់អភិវឌ្ឍន៍សាលារៀនរួមជាមួយការសាងសង់អគារសិក្សាចំនួន២ខ្នងបន្ថែមទៀត ដែលមាន២៨បន្ទប់ អគារស្នាក់នៅមួយខ្នងមាន១០បន្ទប់ អគារទីចាត់ការមួយខ្នង រួមជាមួយនឹងហេដ្ឋារចនាសម្ព័ន្ធរូបវន្តនានា ដែលសរុបថវិកាអស់ប្រមាណ៧៥ម៉ឺនដុល្លារសហរដ្ឋអាមេរិក ដើម្បីបំពេញតម្រូវការរបស់កុមារ។

សំឡេង៖« យើងបានរៀបចំផែនការអភិវឌ្ឍន៍សាលារៀនដែលមានរយៈពេល ៥ឆ្នាំរបស់យើងគឺយើងពង្រីកបង្កើតសាលាថ្មីបន្ថែមទៀតដោយសារគឺកាលឆ្នាំ ២០២១ យើងមានកុមារ ១២០ នាក់កំពុងរង់ចាំ។ហើយសម្រាប់ឆ្នាំ ២០២២ នេះយើងមានកុមារចំនួន ៧០នាក់ទៀតកំពុងរង់ចាំសាលាជាបន្ទាន់ដូច្នេះផែនការរបស់ខ្ញុំគឺខ្ញុំកំពុងពង្រឹងនិងពង្រីកសាលាបន្ថែមបង្កើតអគារថែមដើម្បីឆ្លើយតបតម្រូវការជាក់ស្តែង»។

លោកបានបញ្ជាក់ថា ក្រៅពីផែនការបង្កើតនូវអគារថ្មីៗក៏ដូចជាថ្នាក់រៀនបន្ថែមនៅក្រុងតាខ្មៅ សាលាក៏កំពុងសហការជាមួយក្រសួងពាក់ព័ន្ធដើម្បីពង្រីកសាលានេះទៅកាន់បណ្ដាខេត្តផ្សេងទៀតដោយសារខេត្តមួយចំនួនដូចជាខេត្តសៀមរាបកំពង់ចាមបាត់ដំបងកំពង់ឆ្នាំងពោធិ៍សាត់ដើម្បីឆ្លើយតបឱ្យបានគ្រប់គ្រាន់ចំពោះកុមារខ្សោយសតិបញ្ញានិងអូរទីស្សឹមឱ្យបានទទួល ការបណ្ដុះបណ្ដាលគ្រប់ៗគ្នានិងទាន់ពេលវេលាដើម្បីឱ្យពួកគេអាចសម្របខ្លួនរស់នៅក្នុងសង្គមវិញ ៕ប្រភព៖ វិទ្យុជាតិកម្ពុជា សម្រួលផ្សាយដោយ៖ ធូ កុសល